Nuevu Modelu d’Oficina Xudicial (NUMO)
¿Qué ye NUMO?
El Nuevu Modelu d’Oficina Xudicial forma parte d’una reforma ambiciosa impulsada pola Llei Orgánica 1/2025. El so oxetivu ye ameyorar la eficiencia, l’accesibilidá, la tresparencia y la calidá del serviciu públicu de xusticia, p’averalu a la ciudadanía y adaptalu a los retos actuales.
Cambeos principales
- Tribunales d’instancia: reorganícense los xulgaos unipersonales en Tribunales d’Instancia, órganos colexaos qu’agrupen tolos xulgaos d’un partíu xudicial.
- Reordenación de les Oficines de Xusticia: créense cinco modelos organizativos d’oficina xudicial adaptaos al volume de trabayu de cada xurisdicción. El personal y los recursos afáense a les necesidaes reales de cada territoriu.
- Impulsu a los MASC: promuévese la mediación, l’arbitraxe y otros métodos de solución primero de llegar a xuiciu, siendo obligatorios en civil y mercantil.
- Creación de les Oficines de Xusticia nos Conceyos (OXC): Les Oficines de Xusticia nos Conceyos averen la xusticia a la ciudadanía en sitios ensin tribunal d’instancia. Realicen trámites xudiciales y alministrativos ensin falta de desplazamientos, faciliten la videoconferencia, la tramitación de xusticia gratuita y el trabayu deslocalizáu del personal xudicial.
Oxetivos clave de la reforma
- Xusticia accesible: la reforma busca averar el sistema xudicial a la ciudadanía, sobre manera en zones rurales o con mal accesu, garantizando una atención más directa y allegada.
- Eficiencia organizativa: establezse un modelu nuevu de xestión qu’ameyora la coordinación, amenorga los tiempos d’espera y evita duplicidaes nos procesos.
- Personal especializao: refuérciase la formación continua y la especialización del personal p’afacese a los modelos organizativos nuevos y a les ferramientes tecnolóxiques.
- Tresformación dixital: la dixitalización total del sistema xudicial fai posible trámites más áxiles, automatización de trabayos y un accesu meyor a la información, facilitando la rellación ente ciudadanía y xusticia.
- Interoperabilidá y tresparencia: la integración de los sistemes ameyora la collaboración ente instituciones, mengua errores y garantiza una tresparencia mayor nel siguimientu de los casos.
Guíes informatives
- Colexos profesionales: Guía_informativa_Cprofesionales.pdf
- Personal idóneo: Guía_informativa_P.idóneo.pdf
- Xueces y maxistraos: Guía_informativa_Xueces_Maxistraos.pdf
- LAJs, xestores y tramitadores procesales y auxilios xudiciales: Guía_informativa_LAjs_funcionarios.pdf
Consulta al personal funcionario al serviciu de l'Alministración de Xusticia
La Viceconseyería de Xusticia consulta al personal funcionario d'Uviéu, Xixón y Avilés pa qu'indiquen la so preferencia d'acoplamientu nos Servicios Comunes de Tramitación o Execución. La consulta diríxese a los cuerpos de Xestión y Tramitación, con delles esclusiones que van ser acoplaes d'oficiu. Les solicitúes han mandase nun plazu de cuatro díes hábiles dende l'otru día de la publicación, pente medies del modelu oficial y per corréu electrónicu. L'asignación final va facese teniendo en cuenta les preferencies, y la resolución termina la vía alministrativa, pudiendo recurrise nos plazos llegales.