Condiciones llegales d’usu de miPrincipado del Principáu d’Asturies
Al rexistrate nel serviciu “miPrincipado” disponible na dirección https://miprincipado.asturias.es manifiestes qu’aceptes les condiciones d’usu d’esti serviciu y la so politica de xestión.
Estes condiciones regulen el funcionamientu de miPrincipado ensin perxuiciu de la normativa aplicable a determinaos trámites y actuaciones a les que s’accede al traviés d’esti serviciu dixital.
Procesu de rexistru en miPrincipado
Con calter xeneral, déxase’l rexistru d’usuarios/es, la instalación y execución de les aplicaciones y servicios de miPrincipado a toles persones, ensin perxuiciu de que determinaos trámites y servicios van poder tar acutaos pa persones mayores de 18 años. La persona ha aceptar de forma completa y ensin reserves estes condiciones llegales, garantizando que nun existe limitación o condicionamientu nengún que-y quite d’usar estos servicios.
El rexistru precisa una identificación previa de la persona al traviés del sistema d’identificación y firma electrónica. Almítese la identificación con certificaos dixitales reconocíos pol Principáu d’Asturies, como’l DNI-e o otros de determinaos prestadores de confianza y los sistemes Cl@ve PIN, Cl@ve Permanente y Cl@ve Móvil de l’Alministración Xeneral del Estáu, que’l so funcionamientu ta descritu en https://clave.gob.es/clave_Home/clave.html.
Desque s’identifique, la persona tien que formalizar el so rexistru aceptando estes condiciones llegales. Los campos de cumplimentación obligatoria vienen especificaos como requeríos, y ensin ellos nun va dase trámite a la solicitú correspondiente.
La persona que se rexistre respuende de la veracidá, exactitú, actualidá y calter completu de la información que facilite, asumiendo la responsabilidá y efectos que deriven de lo anterior.
Depués de l’aceptación del rexistru, la persona va recibir un mensaxe de confirmación a la dirección de corréu electrónicu apurrida d’alcuerdu colo anterior.
Desque concluya’l rexistru, el Principáu d’Asturies va verificar los datos d’identidá apurríos tanto cola Dirección Xeneral de Policía, si ye una persona física, como cola Axencia Tributaria si ye una persona xurídica. En casu de discrepancia d’estos datos, nun se va dar d’alta nel serviciu de miPrincipado.
La persona acepta ensin reserva’l conteníu d’estes condiciones d’usu al rematar el rexistru. Amás d’eso, la persona tien que lleeles atentamente enantes del rexistru y del usu de cualquiera de les sos funcionalidaes.
L’usu de miPrincipado ye gratuitu y voluntariu.
La persona que se rexistra nun ta obligada, con calter xeneral, al usu de medios electrónicos pa rellacionase cola Alministración sacante cuando seya un obligáu llegal al usu de medios electrónicos. Sicasí, nel casu de dase d’alta en miPrincipado, la persona acepta espresamente que’l Principáu d’Asturies y cualquiera de los organismos, unidaes, axencies y otros entes públicos vinculaos directamente cola xestión, trámites y actuaciones xestionaes al traviés d’esti serviciu puedan unviar correos y información de trámites que puedan ser del so interés o avisar de novedaes y campañes d’ayudes.
Seguranza y réxime de protección de datos personales
Les midíes de seguranza implementaes correspuéndense coles previstes n’Anexu II del Real Decretu 311/2022, de 3 de mayu, pol que se regula l’Esquema Nacional de Seguranza. Nel procesu de rexistru y depués al traviés del usu de los servicios de miPrincipado recuéyense y trátense datos personales de les persones rexistraes. Tocante a la xestión y usu xeneral de miPrincipado, los datos van tratase pa:
- la xestión de la persona y el procesu de rexistru en miPrincipado
- les comunicaciones sobre temes y servicios d’interés pa la persona rexistrada, d’alcuerdu colos parámetros de busca y preferencies específiques indicaes
- la xestión y tramitación de consultes y duldes sobre’l funcionamientu de miPrincipado
- l’iniciu y centralización de solicitúes y actuaciones empezaes por miPrincipado, y la puesta a disposición y accesu de les notificaciones alministratives que correspuendan en función de los trámites empezaos pola persona rexistrada
Los tratamientos de datos anteriores van llevase a cabu pola Dirección Xeneral d’Estratexa Dixital y Intelixencia Artificial del Principáu d’Asturies y, adicionalmente, polos organismos, unidaes, axencies y otros entes públicos competentes pa la xestión, trámites y actuaciones empezaes al traviés de miPrincipado.
miPrincipado dexa realizar recomendaciones proactives de servicios, trámites y conteníos que potencialmente pudieren resultar d’utilidá o d’interés n’atención a la situación y necesidaes de la persona rexistrada. Lo anterior realízase a partir de los datos de la persona y d’un análisis y perfiláu de datos anonimizaos incorporaos a un repositoriu d’información, coles garantíes llegales correspondientes, de seguranza y confidencialidá. Ello supón que, tanto en función de les sos busques, como col análisis de los datos llograos en miPrincipado de la situación personal (edá, sexu, casa y empadronamientu, circunstancies sociales y familiares, ingresos o rentes), amás de colos datos de perfiláu anónimu, van mostra-y servicios y va recibir alertes rellacionaes con trámites que potencialmente pueden resulta-y d’interés.
Adicionalmente, miPrincipado dexa incorporar automáticamente dellos datos en formularios, solicitúes y otros documentos de cumplimentación por parte de la persona usuaria pa determinaos trámites. Lo anterior supón que determinaos campos van rellenalos automáticamente los sistemes informáticos pa facilitar lo anterior, pudiendo modificalos o eliminalos l’usuariu.
La base xurídica de los tratamientos anteriores nel casu de que seyan datos personales ye’l consentimientu de la persona al alta/rexistru y funcionamientu global de miPrincipado, incluyendo los servicios de recomendación y alertes personalizaes. Adicionalmente, les bases del tratamientu van ser el cumplimientu d’una misión realizada n’interés públicu o l’exerciciu de poderes públicos conferíos a la Dirección Xeneral d’Estratexa Dixital y Intelixencia Artificial y otros responsables del tratamientu que correspuenda a tenor de los trámites realizaos.
Pa la xestión, trámites y demás servicios en miPrincipado, los datos van poder comunicase ente distintes Alministraciones Públiques. En casu de necesidá, l’organu responsable va solicitar autorización esplícita pa la consulta de los datos personales de la persona rexistrada a los organismos competentes pa la so comprobación o verificación d’información, y la incorporación de datos y/o documentos a los espedientes abiertos y al so perfil na Cuenta Dixital. D’esta manera, van comunicase los sos datos a los organismos, unidaes, axencies y entidaes públiques competentes pa la recepción y tramitación d’espedientes y actuaciones abiertes dientro de miPrincipado.
Los datos van tratase de manera confidencial y sobre ellos van aplicase midíes técniques y organizatives afayadices y suficientes que garanticen la privacidá y confidencialidá de los mesmos. Los datos van caltenelos los responsables del tratamientu’l tiempu necesariu pa la realización de les xestiones que correspuendan d’alcuerdu coles finalidaes señalaes y depués, y bloquiaos hasta la prescripción de les posibles responsabilidaes llegales que deriven de lo anterior.
Tocante a los datos que s’almacenen en miPrincipado, l’usuariu va poder exercitar en cualquier momentu los derechos d’accesu, rectificación, oposición, supresión, limitación al tratamientu y portabilidá de los sos datos nes condiciones previstes llegalmente y que pueden consultase nesti enllaz
Usu responsable de los servicios
miPrincipado quier ufiertar un serviciu de calidá y una esperiencia d’usuariu correcta pa les persones rexistraes evitando errores y, nel so casu, igualos o actualizalos lo primero posible. Amás, les persones usuaries acepten que’l serviciu pueda interrumpise cuando seya menester por llabores de caltenimientu y el tiempu indispensable pa que se sigan calteniendo les condiciones optimes de calidá, veracidá y integridá esixíes llegalmente a les sedes electroniques de les Alministraciones Públiques.
Les persones rexistraes en miPrincipado queden obligaes a:
- Facer un usu correctu de la información y de los servicios emprestaos dende o al traviés de miPrincipado, conforme a la llei y a la bona fe.
- Notificar a la Dirección Xeneral d’Estratexa Dixital y Intelixencia Artificial cualquier niciu de la existencia d’usos impropios o prohibíos de los servicios emprestaos dende miPrincipado, o de fallos de seguranza de toa mena.
La Dirección Xeneral d’Estratexa Dixital y Intelixencia Artificial nun va ser responsable en nengún casu del usu indebíu de miPrincipado y de la información ufiertada al traviés d’ella, siendo la persona rexistrada la única responsable polos daños y perxuicios que pudieren derivase d’un mal usu d’estos o de la infracción de lo dispuesto nestes condiciones en que pueda incurrir. La persona usuaria comprométese a caltener indemne a la Dirección Xeneral frente a les reclamaciones o sanciones que pudiere recibir de terceros, yá seyan particulares o entidaes públiques o privaes, por razón d’eses infracciones, amás de frente a los daños y perxuicios de tou tipu que pueda sufrir de resultes de les mesmes.
La Dirección Xeneral d’Estratexa Dixital y Intelixencia Artificial acuta pa ella’l derechu de, en cualquier momentu y ensin falta d’avisu previu, modificar o eliminar el conteníu, estructura, diseñu, servicios y condiciones d’accesu y/o usu d’esti sitiu, siempre que lo considere conveniente y esi cambéu nun afecte a los principios y derechos de protección de datos, amás del derechu d’interpretar estes condiciones en cuantes cuestiones pudiere presentar la so aplicación.
La persona qu’unvie los sos datos o otros documentos al traviés de miPrincipado faise responsable de que tola información facilitada, incluyendo los posibles documentos qu’apurra, ye veraz, correcta y completa, ta actualizada, y va referida a la so persona. Nel casu d’unviar o comunicar datos personales referíos a terceres persones, la persona manifiesta y garantiza informar primero de lo anterior a la persona afectada, tocante a la comunicación y usu específicu de los sos datos, declarando que nun existe torga llegal o estatutaria pa la comunicación de los datos y el so usu posterior nos términos que correspuendan, y que nenguna información facilitada vulnera pactos o alcuerdos de confidencialidá o secretu, nin perxudica los derechos y intereses de terceros.
Llei aplicable
Estes condiciones d’usu van rexise y van interpretase en toos y caún de los sos aspectos pola Llei Española. Naquellos casos nos que la normativa vixente nun prevea la obligación de sometese a un fueru o llexislación determináu, les persones rexistraes arrenuncien a cualquier otru fueru que pudiere corresponde-yos, sometiendose a los xulgaos y tribunales del Principáu d’Asturies.