Descubri miPrincipado
Esperiencia personalizada
Estáu de toles tos xestiones cola Alministración
Toles ayudes y trámites a un clic
En miPrincipado tienes l’Alministración más allegada. Al to serviciu, tolos díes del añu, les 24 hores
¿Qué ye miPrincipado?
miPrincipado naz cola mira de convertise nesa plataforma de servicios públicos dixitales eficiente, áxil y proactiva, que ponga nel centru a les persones y qu’impulse la capacitación dixital de la ciudadanía y empreses n’Asturies, al traviés de la tresparencia nes sos actuaciones.
miPrincipado dispón d'una parte pública, onde se muestra información xeneral y qu'incluye, ente otres coses, l'accesu al catálogu de trámites y servicios de l'alministracion y los servicios del Boletín Oficial del Principáu d'Asturies (BOPA) y una parte privada onde s'ufierta una esperiencia personalizada a partir de les preferencies espresaes pol usuariu.
¿Ye miPrincipado la sede nueva del Principáu d’Asturies?
Sí, miPrincipado ye la evolución de sede.asturias.es y la sede oficial nueva de l’Alministración del Principáu d’Asturies.
¿Qué pasa coles mios xestiones en procesu?
Si yá fixisti un trámite, nun tienes que facer más nada: la to solicitú va siguir nel mesmu estáu de tramitación nel que taba. Vas poder ver el so estáu dientro de miPrincipado > Los mios trámites y espedientes
¿Cómo puedo identificame p’acceder a miPrincipado? ¿Tengo qu’identificame p’acceder a los servicios de miPrincipado?
Pa entrar nos servicios personalizaos de miPrincipado precises identificate colos medios habituales d’identificación electrónica: certificáu dixital, DNI electrónicu, Clave Pin, Cl@ve móvil o Clave Permanente. Puedes entrar na parte pública de miPrincipado ensin falta d’identificate y consultar información sobre trámites, BOPA, tablón d’anuncies, etc.
¿Ónde puedo consultar el BOPA?
L’accesu al conteníu oficial del Boletín Oficial del Principáu d’Asturies va ser al traviés de miPrincipado
¿Cuáles son les característiques de miPrincipado?
- Tiempu real. Accesu a la información alministrativa en tiempu real.
- Personalizable. L’usuariu pue escoyer los sos temes d’interés, sobre los que se va construyir la so esperiencia d’usuariu p’adaptala a los sos intereses o necesidaes.
- Accesible. Cúmplense los estándares d’accesibilidá y adaptabilidá (responsive) a dispositivos móviles. Tamién s’ufierten ferramientes que garanticen l’accesibilidá pa la inclusión de persones con dificultaes auditives o visuales.
- Multicanal. La plataforma de miPrincipado ufiértase tanto al traviés de la web como al traviés d’una aplicación móvil.
- Single Sign On. La identificación de los usuarios va facese namás una vez en cada sesión, que va dexar acceder a tolos servicios ufiertaos, tanto al área personal del usuariu como a la sede xudicial electrónica, carpeta ciudadana, etc.
- Interoperabilidá. Básase nel desenvolvimientu de componentes interoperables ente sí pa llograr la integración de la información contenida nos distintos sistemes d’información.