Hemeroteca dixital del BOPA
Depués d’un procesu de dixitalización que duró dellos meses, el Principáu d’Asturies ye la primer comunidá autónoma en poner a disposición d’investigadores, estudiosos y públicu en xeneral, tolos boletinos dafechu de baldre.
El BOPA difúndese al traviés de la páxina web oficial del BOPA, asitiada nel portal web de l’Alministración del Principáu d’Asturies.
La información oficial del Principáu d’Asturies ta contenida, dende 1835, nuna publicación con una denominación qu’esperimentó variaciones a lo llargo d’esti periodu:
- Boletín Oficial del Principáu d'Asturies (1835).
- Boletín Oficial de provincia d’Uviéu (dende’l 2 de xineru de 1836 hasta’l 28 de febreru de 1838).
- Boletín Oficial d’Uviéu (dende’l 3 de marzu de 1838 hasta’l 14 de xineru de 1857).
- Boletín Oficial de la provincia d’Uviéu (dende’l 16 de xineru de 1857 hasta’l 14 d’ochobre de 1982).
- Boletín Oficial del Principáu d’Asturies y de la provincia (dende’l 15 d’ochobre de 1982 hasta’l 4 d’abril de 1995).
- Boletín Oficial del Principáu d’Asturies (dende’l 5 d’abril de 1995 hasta l’ actualidá).
Hubo dómines onde se publicaron dos o trés boletinos:
- Boletín del Gobiernu de la República (dende’l 15 d’ochobre de 1936 hasta’l 15 d’ochobre de 1937).
- Boletín Oficial del Conseyu Rexonal d’Asturies (dende’l 19 de xineru de 1979 hasta’l 3 de marzu de 1982).
- Boletín Oficial del Principáu d’Asturies (dende’l 19 de mayu de 1982 hasta’l 1 d’ochobre de 1982).
Pa buscar una disposición concreta o llexislación sobre una materia determinada, coles sos afectaciones correspondientes, puedes acceder al buscador avanzáu del BOPA.